MINTA IZIN JANANG KA TANGAH

Pangka ka Ujuang:

Manolah baliau DT... Nan kadipulangkan juo kapado datuek pendek, apolah kapendeknyo, takalo maso dahulunyo, takalo langik basintak naiek, bumi basintak turun, angin tadueh galombang tanang, Iah janieh candonyo pamandangan tasabuik niniak rubiah urang nan cadiak cando kio, urang nan arih bijaksano, pandai maagak maagiehkan, tau dibayang kato sampai, baatohnyo kini kan iyo Iah mambayang candonyo ameh Iah mangilek candonyo perak, pituanyo kami nan kadibarinyo datuek.

Ujuang:

Basaba Datuek samantaro, kato sorang kato babulati kato basamo bapaiyoan, iyo mananti juo DT... samantaro.

Mano baliau Datuek… nan sapanjang panitahan DT nantun kan iyo lah ambo baok kato jo baiyo jo baliau niniak mamak kami sabalah ka ujuang apo nan pituah daripado baliau. Dang katolah mambayang candonyo ameh Iah mangilek candonyo perak, iyo balicak sapanjang alue baturuik sapanjang jalan nyo datuek.

Pangka:
iyo kabalaluan sajo hanyo DT...

Pangka ka Tapi :

Manolah baliau DT... adopun sambah nan ka dipulangkan kapado DT... pendeknyo apolah kapendeknyo, kan iyolah mangatokan sampai pulo palatakan sirajo janang tantangan hidangan nan lah dihidangkan kahariban kito nan basamo nangko, tapi  sungguehpun bak itu DT... layangkan lah pandangan ka nan jaueh tukiekkan lah pandang ka nan dakek ereangkan pandang ka nan rusuek, kurang ko ado ka batukuek sentiang ko ado kababilai, sakian sambah nan kadipulangkan kapado DT... hanyo DT...

Tapi :

Nan sapanjang panitahan DT... nantun itulah kato sabananyo tapi ba a tohnyo kini supayo rantak nak nyo saragam supayo lenggang nak nyo sarayun suto jo turak naknyo salasai nak samo naiek ka hantaran, iyo mananti juo DT... samantaro nak ambo bao kato jo baiyo jo baliau niniak mamak kami sabalah ka tapi nak sapatah kato ambo kapambarinyo DT...

Tapi :

Manolah baliau DT... nan sapanjang panitahan DT nantun kan iyo lah ambo baok kato jo baiyo jo baliau niniak mamak kami sabalah ka tapi apo nan pitua daripado baliau, pun lah kami layangkan pandang ka nan jaueh lah ditukiekkan pandang ka nan dakek lah diereangkan pandang ka nan rusuek, kurang na indak ka batukuek, sentiang nan indak ka babilai, sakian sambah nan ka di pulangkan kapado DT... hanyo DT...   

Pangka :

Dang kato lah dapek pulo ambo kato nan sapatah baiekpun rundiang nan sabuah, lah baiek manyang di hati ambo, tapi ba tohnyo kini iyo lah kabalalukan sajo hanyo DT...

Tapi :

Jan kapalang lalu hanyo DT...