(Sambah Siriah)

Dang katolah dapek pulo kato nan sapatah dari Datuek bayiek manyanang dihati kami. Tapi baatohnyo kini nan kadipulangkan juo kabakeh Datuek iyo nan bak pitua Datuek juo:

Talatak puntiang dihulu. dibawah kumpalan tali, bamulo kato dahulu tigo limbago nan tarjadi, Partamo sambah manyambah, Kaduo baso Jo basi,Katigo sirieh Jo pinang
Sambah manyambah dalam adat tasabuik Jo muluik manih tapakai Jo baso bayiek, muluik manih talempong kato, budi bayiek tali pikatan, panghubuang silaturrahmi banamo adat

sopan santun.

Baatohnyo kini, bacincin parmato tigo, sasuai jo jari kalimonyo, dipakai anak jolong gadang, Iah badantiang bunyi carano barisi siriah limo parkaro panjamu alek nan datang. Kalaluannyo bana Datuek, Ramo-ramo tabang malayang malayang ka koto tuo, Duo tigo jatueh kalubuak, bakirim kami ka rajo janang. Barisi sirieh dalam carano. AIah ko sampai kaaribaan Datuek.

Ujuang:
Nan sapanjang panitahan DT... nantun, lai kato adek lagam pusako, jalan rayo titian batu adek lamo pusako usang, mah kok jalan lah pasa dek baturuik sumue lah janieh dek basawuek, Tapi ba a toh nyo kini kan iyo nan bak pitua DT... juo, aso solok duo salayo, katigo padang ampek kompani, ma dek indah baso urang di siko alun tibo lapiek takambang kami duduek carano tibo suko lanjano  hati kami, kalaluannyo bana molah DT... kok nan sabarih pakiriman DT... barupo sirieh dalam carano kok ditiliek dipandang rupo disilau dipandang roman, iyo lah bayiek tarupo bana kaharibaan kami komah DT...

Pangka:
Dang katolah sampai pakiriman kami karibaan Datuek, lah baiek manyanang di hati kami, tapi ba a toh nyo kini kan bak pitua DT... juo, tanamlah sirieh tanamlah udang, tanam karakok di halaman, kapuelah sirieh gatoklah pinang, gilianglah roko kapamenan tangan hanyo DT...

Ujuang:
Lah kabalaluan sajonyo Datuek

Pangka:
Manolah baliau DT... adopun sambah nan kadipulangkan kapado DT... iyo nan sabarih kapado pakiriman kami tadi barupo sirieh dalam carano, kok siriehnyo alah kolah DT... kapue, timbakaunyo alah kolah DT... rokok, sakian sambah nan kadipulangkan kapado DT... hanyo DT...

Ujuang:
Kok sirieh iyo alah kami kapue, kok timbakau iyo lah sadang kami rokok bana komah DT...

Pangka:
Kok sirieh alah Datuek kapue, kok timbakau sadang Datuek rokok, lah baiek manyanang dihati ambo. Baatohnyo kini sambie baranang minum ayie, sambie manyiruak galah lalu, lai koh lah galik nan biaso hanyo datuek,

Ujuang:
Kok sambie baranang minum ayie sambia manyiruak galah lalu lai galik nan biaso tumah Datuek.

Pangka:
Dang kato Iah dapek kato nan sapatah dari Datuek, Iah bayiek manyanang di hati kami, baatoh kini kadipulangkan juo kabakeh Datuek, sabarih kapado dunsanak datuek, nan turun ditanggo etan, nan naiek katanggo nangko nan dilapeh niniek jo mamak nan diateh, ado juo kolah nan singgah dilapau baruang - baruang, nan singgah dilabuah di tapian, nan jauh nan balun datang, na dakok nan balun tibo, sunggueh pun baitu, pitua kami nan kababarinyo datuek.

Ujuang:

Saujah kabadan diri kami kolah DT...

Pangka :

Bana DT...

Ujuang :

Kok nan saujah kabakeh diri kami nan nyo Iapeh di niniek jo mamak nan dari ateh, nan turun ditanggo etan nan lah naiek katanggo nangko, iyo barang sado nan tarupo nangko nyo datuek.

Pangka ka Tapi :

Manolah baliau DT... adopun sambah nan kadipulangkan kapado DT... pendeknyo apolah kapendeknyo, kan yolah angko sagiro pulo silang nan bapangka karajo nan bapokok sambie kapangka, tantangan hidangan nan kadihidangkan kahariban kito nan basamo nangko, pi sungguehpun bak itu alah patuik kolah janang kito surueh tagak hanyo DT...

Tapi :

Nan sapanjang panitahan DT... nantun itulah kato sabananyo pi ba a toh nyo kini nak nyo satanai salatakkan nak nyo sairiang saenggeran iyo mananti juo DT... samantaro nak ambo baok kato jo baiyo jo baliau niniak mamak kami sabalah ka tapi nak sapatah kato ambo kapambarinyo hanyo DT...

Jawab Tapi :

Manolah baliau DT... nan sapanjang panitahan DT... nantun kan iyolah ambo baok kato jo baiyo jo baliau niniak mamak kami sabalah ka tapi apo nan pituah daripado baliau ma kito

nan duduek nan wakatau bajalan juo iyo alah patuik janang kito surueh tagak komah DT...

Pangka :

Dang kato lah dapek pulo ambo kato na sapatah baiek runding nan sabuah lah baiek manyanang di hati kami, tapi ba atoh nyo kini iyolah kabalaluan sajo lai hanyo DT...

Tapi :

Jan kapalang lalu hanyo DT...